Syiir Ngudi Susilo (Kyai Bisri Mustofa Rembang)

Oleh: Kyai Bisri Mustofa

Rembang

SHOLATULLOHI MA LAHAT KAWAKIB

NGALAHMAD KHOIRI MAR ROKIBAN NAJAIB

iki syiir kanggo bocah lanang wadon

nebihake tingkah laku ingkang awon

***

sarto nerangake budi kang prayogo

kanggo dalan podo mlebu ing suwargo

bocah iku wiwit ngumur pitung tahun

kudu ajar toto keben ora getun

***

kudu tresno ring ibune kang ngrumati

kawit cilik marang bapak kang gemati

ibu bapak rewangono lamun repot

ojo koyo wong gemagus ingkang wangkot

***

lamun ibu bapak printah inggal tandang

ojo bantah ojo sengol ojo mampang

andhap asor ing wong tuwo najan liyo

tetepono ojo koyo rojo koyo

***

gunem alus alon lirih ingkang terang

ojo kasar ojo misuh koyo bujang

yen wong tuwo lenggah ngisor siro ojo

pisan lingguh nduwur koyo jaman jogjo

***

yen wong tuwo sare ojo geger guyon

lamun siro nuju moco kudu alon

lamun siro liwat ono ing ngarepe

kudu nuwun amit sarto ndepe-ndepe

***

lamun ibu bapak duko becik meneng

ojo melu padon ugo ojo greneng

(BAB AMBAGI WEKTU)

dadi bocah kudu ajar bagi zaman

ojo pijer dolan nganti lali mangan

***

yen wayahe sholat ojo tunggu printah

inggal tandang cekat-ceket ojo wegah

wayah ngaji wayah sekolah sinahu

kabeh mau gateake klawan tuhu

***

kenthong subuh inggal tangi nuli adus

wudlu nuli sholat khusuk ingkang bagus

rampung sholat tandang gawe opo bahe

kang prayogo koyo nyaponi omahe

***

lamun ora iyo moco-moco quran

najan namung sithik dadiyo wiridan

budal ngaji awan bengi sekabehe

toto kromo lan adabe podo bahe

***

(ING PAMULANGAN)

lamun arep budal menyang pamulangan

toto toto ingkang rajin kang resikan

nuli pamit ibu bapak kanthi salam

jawab ibu bapak ngalaikumus salam

***

disangoni akeh sithik kudu trimo

supoyo ing tembe dadi wong utomo

ono pamulangan kudu tansah gati

nompo piwulangan ngilmu kang wigati

***

ono kelas ojo ngantuk ojo guyon

wayah ngaso keno ojo nemen guyon

karo konco ojo bengis ojo judas

mundak diwadani konco ora waras

***

(MULIH SAKING PAMULANGAN)

bubar saking pamulangan inggal mulih

ojo mampir-mampir dolan selak ngelih

tekan omah nuli salin sandangane

kudu pernah rajin rapi aturane

***

(ONO ING OMAH)

karo dulur konco ingkang rukun bagus

ojo koyo kucing belang rebut tikus

dadi tuwo kudu weruh ing sepuhe

dadi anom kudu rumongso bocahe

***

lamun bapak ngalim pangkat sugih joyo

siro ojo kumalungkung ring wong liyo

pangkat gampang minggat sugih keno mulih

ngalim iku gampang owah molah-malih

***

arikolo siro madep ring wong liyo

kudu ajer ojo mrengut koyo boyo

(KARO GURU)

marang guru kudu tuhu lan ngabekti

sekabehe printah bagus dituruti

***

piwulange ngertenono kanthi ngudi

nasihate tetepono ingkang merdi

larangane tebihono kanthi yekti

supoyo ing tembe siro dadi mukti

***

(ONO TAMU)

tatkalane ibu romo nompo tamu

ojo biyayaan tingkah polahanmu

ojo nyuwun duwit wedang lan panganan

rewel beko koyo ora tau mangan

***

lamun banget butuh kudu sabar disik

nganti tamu mundur dadi siro becik

arikolo podo bubaran tamune

ojo nuli rerebutan turahane

***

koyo keting rerebutan najis tibo

gawe malu lamun dideleng wong njobo

kejobo yen bapak dawuh he anakku

iku turahe wong ngalim kyaiku

***

bagi roto sak dulurmu keben kabeh

katularan ngalim sugih bondo akeh

niat iro nuprih berkahe wong mulyo

ora niat rebut turahe wong liyo

***

(SIKAP LAN LAKU)

anak islam iki mongso kudu awas

ojo nganti leno mengko mundak tiwas

luru ngilmu iku perlu nanging budi

adab islam kudu tansah dipersudi

***

akeh bocah pinter nanging ora bagus

budi pekertine sebab dho gemagus

ring wong tuwo gak ngergani gak ngajeni

sajak pinter dewe longko kang madhani

***

jare iku caranipun sak puniko

ora ngono dudu intelek merdeko

ngagem blangkon serban sarung dadi gujeng

jare ora kebangsaan ingkang majeng

***

sawang iku pangeran diponegoro

imam bonjol tengku umar kang kuncoro

kabeh podho belo bongso lan negoro

podo ngagem destar pantes yen perwiro

***

gujeng serban sasat gujeng imam bonjol

sak kancane he anakku ojo tolol

timbang gundul opo ora luwih bagus

ngagem tutup sirah koyo raden bagus

***

kolo-kolo pamer rambut sak karepmu

nanging kudu eling papan serawungmu

kumpul mudho bedo karo pul yaine

nuju sholat gak podho melancong nujune

***

ora nuli melancong gundul sholat gundul

sowan morotuwo gundul nguyuh gundul

(CITA-CITA LUHUR)

anak islam kudu cita-cita luhur

keben dunyo akhirote biso makmur

***

cukup ngilmu ngumume lan agamane

cukup dunyo kanthi bekti pengerane

biso mimpin sak dulure lan bangsane

tumuju ring raharjo lan kemulyane

***

iku kabeh ora gampang leksanane

lamun ora kawit cilik to citane

cita-cita kudu dikanthi gumergut

ngudi ngilmu sarto pekerti kang patut

***

kito iki bakal tininggal wong tuwo

ora keno ora kito mesthi muwo

lamun kito podho katekan sejane

ora liwat siro kabeh pemimpine

***

negaramu butuh mentri butuh mufti

butuh qodli patih seten lan bupati

butuh dokter butuh mister ingkang pinter

ngilmu agomo kang nuntun laku bener

***

butuh guru lan kyai kang linangkung

melu ngatur negorone ora ketung

iku kabeh sopo maneh kang ngayahi

lamun ora anak kito kang nyaguhi

***

kejobo yen siro kabeh ridlo mbuntut

selawase angon wedhus nyekel pecut

siro ridlo goncek cikar selamine

kafir iro mentul-mentul lungguhane

***

ora nyelo angon wedhus numpak cikar

asal cita-cita ngilmu biso nenggar

nabi kito kolo timur pangon mendo

ing tembene pangon jalmo kang sembodo

***

abu bakar shidiq iku bakul masar

nanging noto masyarakat ora sasar

ali abu tholib bakul kayu bakar

nanging tangkes yen dadi panglima besar

***

wahid hasyim santri pondok gak sekolah

dadi mentri karo liyan ora kalah

kabeh mau gumantung ing sejo luhur

kanthi ngudi ilmu sarto laku jujur

***

tekan kene pungkasane syiir iki

larikane wolu limo kurang siji

mugo-mugo sejo kito sinembadan

dening alloh ingkang nurunake udan

***

pinaringan taufiq sarto hidayah

dunyo akhirote sehat wal ngafiah

AMIN AMIN AMIN AMIN AMIN AMIN

FAL HAMDULIL ILAHI ROBBIL NGALAMIN

***

TAMMAT

KH Bisri Mustofa

Rembang, Jumadil Akhir 1373H

***

{Lihat Bacaan}

Mustofa, Bisri. 1373 H. Syiir Udi Susilo. Kudus: Penerbit Menara Kudus.

{Perincian Kitab}

Judul Kitab : Syi’ir Udi Susilo

Pengarang : Kyai Bisri Mustofa Rembang

Bahasa : Jawa

Tulisan : Pegon

Penerbit : Menara Kudus (Kudus & Yogyakarta)

Tahun : 1373 H

Jumlah Halaman: 16

Harga (2011) : Rp 1.500,-

Hak cipta dilindungi undang-undang.